«Нам» айан суолугар кумах куталлар

«Нам» айан суолугар элбэх хаар түһэн уонна тоҥоруу буолан, массыыналар харыылара үөскээн, үөһэ тахсыыларга уонна аллараа түһүүлэргэ кумах куталлар. Бу туһунан СӨ Суолга куттал суох буолуутун судаарыстыбаннай инспекциятын пресс-сулууспата иһитиннэрэр.

Бэҕэһээ, алтынньы 9 күнүгэр, «Нам» айан суолун 55-с килэмиэтиригэр баар үөһэ тахсыыга массыыналар харыылара үөскүү сырытта.

«Ниссан манипулятор уонна Камаз таһаҕас массыыната суол туругун учуоттаабакка, массыыналар халтырыйан суолга туора туран, атын айан массыыналарын суолларын бүөлээтилэр»,— диэн полиция полковнига, Суолга куттал суох буолуутун судаарыстыбаннай инспекциятын суол кэтэбилин салаатын салайааччыта Айсен Прокопьев кэпсээтэ.

Суол постка турар сулууспатын инспектордара, ис дьыала үлэһиттэрэ уонна анал тиэхиньикэ оннугар тиийэн, киэһэ 23.00 чааска суол биир балаһатынан айан сөргүтүллүбүт, 02.00 чааска толору чөлүгэр түспүт.

«Бүгүн бу учаастакка уонна салгыы «Нам» айан суолун уопсай устатынан кумах кутар анал тиэхиньикэ айаннаата», — диэн бэлиэтээтэ.