Нам олохтоохторо хаар уонна муус скульптураны оҥорууга РФ Кубогар иккис миэстэ буоллулар

Нам улууһун Модутуттан сылдьар скульптордар Василий уонна Анатолий Аргуноватар Пермь куоракка ыытыллыбыт «Кыһыҥҥы вернисаж» хаар уонна муус скульптураны оҥорууга РФ Кубогар иккис миэстэ буоллулар. Бу туһунан «Биир буолуу» РФ скульптордарын коммерческайа суох пуондатын пресс-сулууспата иһитиннэрэр.

Куонкурус тиэмэтэ — «Халты туттарар кэрэ», кыттааччылар 15 айар үлэни көрдөрдүлэр. Саха сирин маастардара «Куйаарга айан» композициянан кытыннылар.

«Куонкурус тиэмэтэ — олус ураты, билигин кэрэни уонна бэйэ-бэйэни харыстааһын ураты сытыытык турар. Биһиги тиэмэни дьүкээбилгэ, куйаарга көтүү нөҥүө арыйдыбыт. Халты туттарар кэрэни, кыл түгэни тутан хаалыы. Хас биирдии киһи баҕа санаалаах буолуохтаах», — диэтэ Василий Аргунов.

Муус оҥоһук куонкуруһугар Пермь, Екатеринбург, Москва, Санкт-Петербург, Рязань, Чебоксар, Курган, Аллараа Тагил, Комсомольск-на-Амуре, Красноярскай, Хабаровскай, Дьокуускай, Ялта уонна Минскэй куораттартан уопсайа 30 муус оҥоһук кытынна.

«Кыһыҥҥы вернисаж» Кубога хаар уонна муус оҥоһуктар скульптураларын норуоттар икки ардыларынааҕы таһымнаах, РФ култууратын министиэристибэтин өйөбүлүнэн ыытыллар Россияҕа уонна дойду үрдүнэн соҕотох куонкурус буолар.