Нам Таастааҕар саха ынаҕын иитиигэ анаммыт саҥа хотон үлэҕэ киирдэ

Нам улууһун Таастаах сэлиэнньэтигэр «Агрохолдинг Туймаада» АУо инвестиционнай бырагырааматын чэрчитинэн, саха ынаҕын иитиигэ анаммыт 150 миэстэлээх саҥа хотон үлэҕэ киирдэ. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрэр.

Бүгүҥҥү күҥҥэ хаһаайыстыба 172 сүөһүлээх, ол иһигэр 52 ыанар ынах.

Саҥа хотон ититии ситиминэн, уотунан, аныгы үйэҕэ эппиэттиир толору механизациялаах бэйэтэ уулатар, ыыр, сааҕы ыраастыыр уонна үүтү сойутар аппарааттарынан хааччылынна. Ону тэҥэ исписэлиистээр үлэлиир кэбиниэттэрэ, үлэһиттэр таҥастарын уларыттар уонна сынньанар хосторо тэрилиннилэр.

Тыа хаһаайыстыбатын миниистирэ Александр Атласов бэлиэтээбитинэн, бу саха сүөһүтүн иитиигэ анаммыт иккис эбийиэк буолар. 2018 сыллаахха Эбээн Бытантай Баатаҕайыгар бастакы толору хааччыллыылаах 120 миэстэлээх хотон үлэҕэ киирбитэ. Кэлэр сылларга Горнай, Үөһээ Бүлүү, Амма улуустарыгар маннык хотоннор тутуулара былааннанар.

Санатан эттэххэ, Ил Дархан ыйааҕынан 2024 сылга диэри саха ынаҕын ахсаанын 660-тан 1000-ҕа диэри элбэтэр сорук турар. Бу сыалы ситиһэргэ 2019 сылга «Сахаагроплем» уонна «Бытантай» генофонднай питомниктар киирэр, «Саха сүөһүтэ» генофонданан дьарыктанар тэрилтэ тэриллибитэ.

Ол курдук, быйыл 2020 сылга Миирнэй оройуонун Сүльдүкээр сэлиэнньэтигэр 156 саха сүөһүтэ тиэрдиллибитэ, Ньурба улууһун Чкалов сэлиэнньэтигэр — 100.