Нам техникумун дьиэтигэр баһаар таҕыста

Нам улууһун Граф Биэрэгэ сэлиэнньэтигэр баар техникум дьиэтигэр баһаар таҕыста. Бу туһунан Россия ыксаллаах быһыыга-майгыга министиэристибэтин өрөспүүбүлүкэтээҕи салаатын пресс-сулууспата иһитиннэрэр.

«Баһаар тахсар кэмигэр үөрэх бырассыаһа ыытыллыбатах. Биир да киһи эмсэҕэлээбэтэ», – диэн иһитиннэриигэ этиллэр.

Баһаарынайдар ыҥырыыга түөрт мүнүүтэ иһигэр тиийэн 20 квадратнай миэтэрэ иэннээх сиргэ уоту умуруордулар.

Уоту утары охсуһууга баһаарынай сулууспа 12 үлэһитэ уонна үс тиэхиникэ кыттыыны ылла.

Уот информатика кэбиниэтигэр тахсыбыта этиллэр. Быһа сабаҕалаан, уот кылгас замыканиеттан тахсыбыт буолуон сөп.

Оннугар баһаар биричиинэтин, хоромньу кээмэйин уонна буруйдааҕы быһаарар дознаватель үлэлиир.