Национальнай библиотека 2020 сыл 10 саамай ааҕыллар кинигэлэрин билиһиннэрдэ

Өрөспүүбүлүкэтээҕи национальнай бибилиотека 2020 сыл саамай ааҕыллар кинигэлэрин испииһэгин таһаарда. Бу туһунан бибилотека пресс-сулууспата иһитиннэрэр.

Саха сирин үс тыһыынчаттан тахса олохтооҕо Василий Яковлев–Далан «Тыгын Дархан» романын аахпыта этиллэр. Бу Тыгын туһунан уонна кини олорбут кэмигэр олоҕурбут бастакы сахалыы уус-уран айымньы буолар. Кини аата саха норуотун историятын биир саамай сүрүн кэрдииһин кытта ыкса сибээстээх.

Софрон Данилов «Сүрэх тэбэрин тухары» романа иккис саамай ааҕыллар кинигэ буолбут. 1967 сыллаахха суруйааччы бу кинигэтинэн Былатыан Ойуунускай аатынан өрөспүүбүлүкэтээҕи бириэмийэнэн бэлиэтэммит. Бу айымньыны «Современник» уонна «Роман-газета» кинигэ кыһалара хаста даҕаны нуучча тылынан бэчээттээн таһаарбыттар, ону тэҥэ Алма-Атаҕа казахскайдыы уонна Ригаҕа латыш тылынан тылбаастанан тахсыбыт.

Василий Яковлев–Далан «Тулаайах оҕо» романа үһүс миэстэ буолбут. Бу ааптар саха норуотун историятын сырдатыыга холонор бастакы айымньыта буолар. Роман сахалар Бүлүү өрүс тардыытынан олохсуйууларын, уһук хоту дойдуга ынах иитиитин сайыннарыыларын туһунан тылынан уус-уран айымньыларга — үһүйээннэргэ уонна түбэлтэлэргэ олоҕуран суруллубут.

Төрдүс миэстэ — «Иччилээх кэпсээннэр: (дьиҥнээх олохтон)» бу Саха сирин араас муннугар буолбут дьикти түбэлтэлэр хомуурунньуктара.

Бэһис миэстэҕэ — Аркадий Гайдар «Чук уонна Гек» кэпсээнэ. Бу эдэр көлүөнэ умсугуйан туран ааҕар аҕыйах ахсааннаах Сэбиэскэ ааптардарыттан биирдэстэрэ. «Чук уонна Гек» – икки бииргэ төрөөбүт уолаттар ийэлэрин кытта хоту геологынан үлэлли сылдьар аҕаларын көрсө барыыларын туһунан сэһэргиир көрдөөх кэпсээн.

Алтыс миэстэҕэ — Николай Мординов — Амма Аччыгыйын «Саскы кэм» романа. Ромаҥҥа революция иннинээҕи дьадаҥы сахалар олохторун, Сэбиэскэй былаас иһин охсуһуу, саҥалыы олорор-үлэлиир быраап иһин туруулаһыы туһунан кэпсэнэр.

Сэттис миэстэҕэ — Николай Лугинов «Таас тумус: cэһэннэр» хомуурунньуга. Манна суруйааччы «Таас тумус», «Кустук», «Суор», «Күрэх», «Үҥкүү» кэпсээннэрэ киирэллэр. Бу саха норуодунай суруйааччыта маҥнайгы айымньыларын хомуурунньуктарыттан биирдэстэрэ буолар.

Ахсыс миэстэҕэ — Петр Слепцов уонна Владимир Лиханов түмпүт «Саха тылын быһаарыылаах тылдьыттарын» бастакы туома. Тылдьыт саамай уратыта диэн, манна түөлбэ тыллар, норуот тылынан уус-уран айымньытын матырыйааллара киирэллэр. Тылы быһаарыы нууччалыы уонна сахалыы бэриллэр.

Тохсус миэстэҕэ — Василий Яковлев–Далан «Тыгын Дархан» романын нуучччалыы тылбааһа.

Онус миэстэҕэ — «Аптаах холбуйачаан» хоһооннор, остуоруйалар, кэпсээннэр, таабырыннар хомуурунньуктара.

2020 сыл устата бибилиотека ааҕааччылара үс мөлүйүөнтэн тахса кинигэни аахпыттар.