«NAUKA 0+» бэстибээлгэ мас тардыһыыга ананар анал датчиктаах маһы көрдөрдүлэр

Мас тардыһыыга ананар, көннөрдөххө бэйэтэ күрэх саҕаланыытын биллэрэр датчиктаах маһы, Дьокуускай куорака ыытыллыбыт наука бэстибээлигэр көрдөрдүлэр. Бу туһунан «Спорт Якутии» иһитиннэрэр.

Алтынньы 19-20 күннэригэр «Россия — мин устуоруйам» историческай пааркаҕа «NAUKA 0+» VII наука бэстибээлин быыстапката ааста.

Быыстапка чэрчитинэн Чурапчытааҕы физическай култуура уонна спорт институута мас тардыһыыга туһаайыллар научнай үлэлэрин көрдөрдүлэр.

«Көннөрдөххө бэйэтэ күрэх саҕаланыытын биллэрэр, анал датчиктаах мас дьон киэҥ интэриэһин тарта. Бу оҥоһук судьуйалар үлэлэрин чэпчэтэр сыаллаах», – диэн этиллэр.

Ону тэҥэ мас тардыһыы кэмигэр спортсменнар былчыҥнара хайдах үлэлиирин чинчийии түмүгүн, 3D форматынан экраҥҥа көрдөрдүлэр.

Инникитин бу чинчийиини спортсменнар дьарыктарыгар туһанан, маастарыстыба тиэхиньикэтин тупсарар, ону тэҥэ дьарык кэмигэр араас тыраамба ылыыларын суох оҥоруохха сөп.