Үүнэн эрэр өрөбүллэргэ Дьокуускай култуурунай бырагыраамата

Дьокуускай олохтоохторо уонна ыалдьыттара өрөбүллэрин туһалаахтык хайдах уонна ханна атаарыахтарын сөбүй? Бу өрөбүллэргэ куорат киинэ тыйаатырдарыгар 10-тан тахса киинэ көстүөҕэ уонна түөрт испиктээкил туруоруллуоҕа.

Дьон-сэргэ биллэн турар өрөбүл күннэргэ дьэ иллэҥ буолан, нэдиэлэ устата тахсыбыт саҥа киинэлэри көрөргө тиэтэйэр. Бу икки күн киинэ тыйаатырдарыгар ордук элбэх дьон сылдьар. Ол курдук субуотаҕа уонна баскыһыанньаҕа 18 киинэни уонна биир мультигы улахан экраҥҥа көрүөххэ сөп.

Бу 19 киинэттэн үһэ сахалыы киинэ: «Муза», «Ийэкээм» уонна «Экспедиция». «Экспедиция» премьерата алтынньы 10 күнүгэр, оттон «Ийэкээм» киэнэ балаҕан ыйын 12 күнүгэр буолбут буоллаҕына, «Муза» диэн киинэни ааспыт сыл балаҕан ыйын 2 күнүгэр көрдөрөн саҕалаабыттара. Балтараа сыл устата көстө турар киинэҕэ сүрүн оруоллары оҕолор толорбуттара. Манна ырыаһыт буолуон баҕарар Муза диэн ааттаах кыыс туһунан кэпсэнэр.

Ону сэргэ үс тыйаатырга түөрт испиктээкили туруоруохтара. Былатыан Ойуунускай аатынан Саха тыйаатырыгар Өксөкүлээх Өлөксөй уонна Алампа айымньыларыгар олоҕуран туруоруллубут «Өй Сүрэх икки мөккүөрүн» көрүөххэ сөп. Олоҥхо тыйаатыра «Таптал талыыта» диэн дьүһүйүүнү туруорда. Оттон нуучча тыйаатыра «Слишком женатый таксист» уонна «Без паники, синьоры» диэн испиктээкиллэри көрдөрүөҕэ.

Маны таһынан өрөбүллэргэ 15 быыстапкаҕа сылдьыахха сөп. Балартан үксэ мэлдьи туруоруллубут быыстапкалар. Ордук «Кыһын саха сириттэн саҕаланар» бэстибээл чэрчитинэн тохсунньу 19 күнүгэр диэри туруоруллар «Бал снежной долины» диэн ааптарыскай куукулалар быыстапкалара кэрэхсэбиллээх. Норуоттан доҕордоһуутун киинигэр оҥоһуктары көрөртөн уонна кэрэхсииртэн ураты, миэстэтигэр бэйэҥ эмиэ куукула оҥорон холонон көрүөххүн сөп.

Виктор Цой талаанын сүгүрүйээччилэр субуотаҕа «Триумф» уораҕайыгар тиэтэйиэхтэрин наада. Манна «Кино» бөлөх музыкаларын симфоническай оркестр толорор кэнсиэрэ буолуоҕа.