Үүнэр көлүөнэ пуондата «Кинигэни тапталы кытта бэлэхтээҥ» аахсыйаҕа кытынна

Үүнэр көлүөнэ целевой пуондатын генеральнай дтриэктэрэ Владимир Егоров СӨ Национальнай библиотекатыгар ыалдьыттаата.

Тэрилтэ үлэһиттэрэ салааларынан, ааҕар сааланан, кинигэ харыстанан ууруллар сиринэн, электроннай өҥө секторынан, докумуоннары оцифровкалыыр лабораториянан экскурсия тэрийдилэр. Экскурсия кэмигэр ыалдьыкка Өйдөбүнньүк кинигэлэр кииннэрин пуондатыгар хараллан сытар сэдэх кинигэлэри көрдөрдүлэр.

Билиҥҥи туругунан, Национальнай библиотека пуондатыгар икки мөлүйүөн кэриҥэ докумуон баар. Аан дойдуга кинигэни бэлэх уунар күҥҥэ анаммыт «Кинигэни тапталы кытта бэлэхтээҥ» аахсыйа чэрчитинэн, Владимир Егоров библиотека пуондатыгар, кинигэ ааптара Марина Кравченко илии баттааһыннаах — «Актеры отечественного кино» түөрт туомнаах энциклопедияны бэлэхтээтэ.

«Кинигэҕэ киинэ бары артыыстарын библиографиялара уонна фильмография баар. Россияҕа бу бастакы тутаах үлэ буолар, манна сэбиэскэй уонна билиҥҥи кэм киинэ артыыстара киирдилэр. Ааптар өр сыллаах үлэтин, эһиэхэ, долгуйан туран бэлэх уунабын. Баҕар бу кинигэ быһыытынан тахсыбыт бүтэһик энциклопедия буолуон сөп. Марина Валерьевна бу кинигэни 15 сылтан ордук суруйан таһаарда, өрөспүүбүлүкэ киин библиотекатын ааҕааччыларын интэриэһин тардыаҕа диэн бигэ эрэллээхпин», — диэтэ Владимир Егоров.

Түөрт туомнаах энциклопедияҕа 1908 сыллаахтан уһуллубут сэбиэскэй киинэ артыыстарыттан саҕалаан билиҥҥи кэмҥэ диэри артыыстар биографиялара суруллар. Кинигэ сыаннаһа — бүгүҥҥү күҥҥэ киинэ артыыстарын тустарынан толору тахсыбыт энциклопедия. Кини айар талааннаах дьон биографияларын култуурнай нэһилиэстибэтигэр киирэр. Кинигэ киинэни таптааччыларга, киинэ эйгэтин идэлээхтэригэр ананар.

Саха сиринээҕи национальнай библиотека уонна Үүнэр көлүөнэ пуондата бииргэ үлэлэһэр туһунан былааннарын кэпсэтистилэр. Библиотека дириэктэрэ Саргылана Максимова Владимир Егоровка киһи хапытаалын сайыннарар сыаллаах «Личность сайдыытын оскуолата» бырайыак спикера буоларыгар этии киллэрдэ.

Библиотека үлэһиттэрэ Пуонда саҥа концепциятын сыала-соруга олоххо киирэригэр, оҕо эрдэ уонна араас хайысханан сайдар бырайыактара олохтонууларыгар актыыбынайдык кыттарга бэлэмнэрин биллэрдилэр.