Нерюнгри оройуонугар түөкүттэр олохтоохтортон 100 тыһ. тахса солк. сууманы уорбуттар

Борокуратуура уонна баан үлэһиттэринэн сирэйдэнэн, түөкүттэр, Нерюнгри оройуонун икки олохтооҕуттан уопсайа 100 тыһыынча солкуобайы уордулар. Бу туһунан РФ ис дьыала министиэристибэтин Нерюнгритааҕы салаатын пресс-сулууспата иһитиннэрэр.

Ол курдук, 44 саастаах эр киһи, киниттэн 48,6 тыһыынча солкуобайы уорбуттарын туһунан полицияҕа сайабылыанньа суруйбут. Бу иннинэ эр киһиэхэ баан куттала суох буолуутун үлэһитэ эрийбит уонна «ДомКлик» сервис нөҥүө өҥө төлөбүрүн оҥоро сатыылларын иһитиннэрбит. Салгыы эр киһини «операторга» көһөрбүттэр, каарта дааннайын ыйыппыттар уонна «эпэрээссийэни тохтотуу» диэн саҥарарыгар көрдөспүттэр. Ити кэнниттэн эр киһиттэн 48,6 тыһыынча солкуобай каартатыттан уһуллубут.

Атын түбэлтэ. Чульмантан сылдьар 61 саастаах пенсионер дьахтарга Москва киин борокуратууратын үлэһитэ эрийэн, сыл аҥарын анараа өттүгэр эмп сакаастаабытыгар атын эмп ыытыллыбытынан, 450 тыһыынча солкуобайдаах компенсация көрүллэрин туһунан иһитиннэрбит. Бу хампаанньа сабыллыбытын уонна холуобунай дьыала тэриллибитин туһунан итэҕэтиилээхтик эппит. Компенсацияны ылар туһугар 25 тыһыынча солкуобайы төлүөхтээҕин, ону тэҥэ 100 тыһыынчаттан тахса суумаҕа үбү страховкалыахтааҕын туһунан «борокуруор» билиһиннэрбит. Дьахтар, ыйыллыбыт харчы сороҕун счекка көһөрбүт уонна компенсацияны ылбатах. Ол түмүгэр, кини 55 тыһыынча солкуобайыттан маппыт.

Баан үлэһиттэрэ кредитнэй этиини эрэ билиһиннэрэр кыахтаахтарын полиция сэрэтэр. Каартаҕа уорбаланар операциялар тустарынан иһитиннэриини түөкүттэр эрэ тиэрдиэхтэрин сөп.

Кэпсэтээччи компенсация туһунан этэр уонна үбү-харчыны ыларга араас ороскуоту төлөттөрөр туһунан кэпсэтэр буоллаҕына тохтуохха — бу түөкүттэр.