Нерюнгрига дьиэ табаларын ыттылар

Нерюнгри оройуонун «Золотинка» Муниципальнай унитарнай тэрилтэ табаларын биллибэт дьон ыттылар.

Полиция үлэһиттэрэ Иенгра нэһилиэгин тыатыгар, кыыллар өлүктэрин аттыттан 12 калибрдаах саа ботуруоннарын буллулар. Табалары икки нэдиэлэ анараа өттүгэр өлөрбүттэрэ сабаҕаланар, миэстэлэринэн араартаан эттэрин илдьэ барбыттар.

Ночооттоох дьон полицияҕа сайабылыанньа суруйда.

Министиэристибэ бэрэбиэркэ ыытарын туһунан СӨ Тыа хаһаайыстыбатын министиэристибэтин Хотугу салаатын сайдыытын отделын салайааччыта Иннокентий Баланов иһитиннэрдэ.

Эрдэ социальнай ситимҥэ, браконьердар табалары өлөрбүттэрин туһунан видео тарҕаммыта.