Николай Валуев Дьокуускайга эдэр боксердары кытта көрүстэ

Госдума дьокутаата Николай Валуев бүгүн Дьокуускайга эдэр боксердары кытта көрүстэ, оҕолор ыйытыыларыгар хоруйдаата, ону тэҥэ уопутун үллэһиннэ.

Биир бастакынан оҕолор спортсмен хас ыйааһыннааҕын туоһуластылар. Онуоха 10 киилэ ыран билигин 160 киилэлээхпин диэтэ. Салгыы Николай Валуев үрдүк чыпчаалга тахсарга, ситиһиилээх буоларга дьиссипилиинэ уонна дьулуур ирдэнэрин бэлиэтээтэ.

Дьокутаат өрөспүүбүлүкэҕэ сырыытын сүрүн соруга — айылҕа харыстабылын министиэристибэтин салалтатын кытта көрсүү уонна Саха сирин экологиятын туругун билсии буолар.