Ньурбаҕа буолбут баһаарга үс киһи суорума суолламмыт

Ньурбаҕа элбэх кыбартыыралаах дьиэҕэ тахсыбыт баһаарга үс киһи суорума суолламмыт. Бу туһунан ЫБММ өрөспүүбүлүкэтээҕи салаатын пресс-сулууспата иһитиннэрэр.

Икки этээстэээх элбэх кыбартыыралаах мас дьиэҕэ баһаар тахсыбытын туһунан иһитиннэрии олунньу 22 күнүгэр киэһэ киирбит. Баһаарынай-быыһыыр сулууспа бастакы бөлөҕө тиийиитигэр бастакы этээскэ биир кыбартыыра уотунан хабыллыбыт.

«Баһаары умуруоруу кэмигэр уокка былдьаммыт кыбартыыраттан үс өйүн сүтэрбит киһини таһааран суһал көмө медиктэригэр туттарбыттар. Реанимациялыыр үлэлэр ыытыллыбыттарын үрдүнэн, 1973, 1976, 1989 сыллаах төрүөх үс киһи тыына быстыбыт», — диэн этиллэр.

Баһаар 30 квадратнай миэтэрэ иэннээх сири сиэбит. Быһылаан тахсыбыт сиригэр ЫБММ дознавателлэрэ, ону тэҥэ силиэстийэлиир кэмитиэт силиэдэбэтэллэрэ уонна криминалистар үлэлииллэр.