Ньурбаҕа Сталин пааматынньыгын туруордулар

НВК САХА — Улуу Кыайыы 75 сыллаах үбүлүөйдээх сылын чэрчитинэн, Ньурба куоратын Кыайыы болуоссатыгар Сталин пааматынньыгын туруордулар.

«Пааматынньык оҥорон туруоруутун олохтоох КПРФ баартыйа бэрэстэбиитэллэрэ бэйэлэрэ үбүлээтилэр. Бүлүү бөлөх улуустар хоммуньуустарын барыларын  үөрүүлээх арыйыыга ыҥырдылар. Ыҥырыллыбыт ыалдьыттартан ураты олохтоох нэһилиэнньэ пааматынньык арыллыытыгар көхтөөх кыттыыны ылла», – бу туһунан Ньурба улууһун дьаһалтатын исписэлииһэ Ольга Алексеева кэпсээтэ.

Санатар эбит буоллахха, бу генералиссимус Иосиф Сталин Саха сиригэр маҥнайгы бюhа буолбатах. Маннык монуменнар хайыы үйэ Мииринэй уонна Амма улуустарыгар уонна Дьокуускай куоракка бааллар.

«Левада-центр» сыл аайы ыытар ыйытыга көрдөрөрүнэн, Россия олохтоохторун 70 %-на Сталин историяҕа оруола үчүгэй диэн ааҕаллар.