Ньурба икки оскуолатыгар «Үүнүү туочукалара» үлэлэрин саҕалаатылар

Ньурба улууһун Хорула уонна Антоновка сэлиэнньэлэрин оскуолаларыгар «Үүнүү туочукалара» сыыппараҕа үөрэхтээһин кииннэрэ үлэлэрин саҕалаатылар. Бу туһунан улуус дьаһалтатын пресс-сулууспата иһитиннэрэр.

«Тыа сирин оскуолаларын үөрэнээччилэрэ аныгы олох тэтимиттэн хаалсыбакка саҥа технологияларынан, бырайыактарынан дьарыктанар уонна олору олоххо киллэрэр кыахтаннылар», –  диэн улуус баһылыга Алексей Михайлов бэлиэтиир.

2019 сылга «Үүнүү туочукалара» Маалыкай уонна Марха сэлиэнньэлэрин оскуолаларыгар тэриллибиттэрэ этиллэр.

Маннык кииннэр уратыларынан роботтары оҥорууну, 3D-моделированиены, цифровой грамотноһы үөрэтэргэ 3D-принтердэртэн саҕалаан VR/AR шлемнарга тиийэ аныгы тиэхиньикэнэн хааччыллыылара буолар.

Россия бэрэсидьиэнэ Владимир Путин көҕүлээһининэн олохтоммут «Үөрэҕирии» национальнай бырайыак чэрчитинэн, 2022 сыл бүтүөр диэри Саха сиригэр 287 «Үүнүү туочукалара» тэриллиэхтэрэ.