Ньурба улууһугар икки үлүйэ сыспыт эр дьону быһаатылар

Ньурба улууһун Чкалов сэлиэнньэтигэр айаннаан тиийиэхтээх икки эр дьон сүппүттэрин туһунан иһитиннэрии тохсунньу 31 күнүгэр олохтоох бириэмэнэн 4.30 чааска киирбит. Бу туһунан Сууһал быһыыр сулууспа тириэрдэр.

«Биллибитинэн, 23.00 чааска дьонноох массыына тыа суолугар иҥнэн хаалбыт. Биирэ сатыы көмө көрдүү баран баран сүтэн хаалбыт, иккиһэ 4.30 чааска диэри кэтэһэ сатаан баран аймалҕан таһаарбыт. Көрдүүр эппэрээссийэ түмүгэр сарсыарда 7.00 чааска Ньурба улууһун Акана сэлиэнньэтиттэн 30 килэмиэтирдээх сиргэ иҥнэн турар собуоттаах массыынаны уонна биир эр киһини буллулар. Иккис эр киһини атаҕын суолунан сирдээн, балтараа чаас буолан баран буллулар. Тоҥмут уонна сэниэтэ суох эр киһи дэриэбинэҕэ диэри 10 килэмиэтир тиийбэтэх», – диэн этиллэр.

Быһыыр сулууспа исписэлиистэрэ бэлиэтииллэрин түүн тыала суох, салгын температурата -25 кыраадыска тэҥнэһэр эбит. Бөһүөлэктэн массыынаны оруурга көмө тыраахтар ыҥырыллыбыт.

Көмө көрдүү барбыт эр киһи таҥаһа чараас буолан тоҥмута этиллэр. Түүн суолун төлөппүөнүнэн, онтон испиискэнэн сырдатынан хаампыт. Тоҥуу уонна үлүйүү сибикилээх Акана сэлиэнньэтин балыыһатыгар тиксэрилиннэ.

Эр дьон иккиэн туруктара чэгиэн, үлүйүүлэрэ суоҕа бэлиэтэнэр.