Ньурбачаан оскуолатыгар коза иитэллэр

Ньурба Ньурбачааныгар ааспыт сылтан оскуола иһинэн үлэлиир бизнес-инкубатор сүнньүнэн коза иитиитинэн дьарыктаналлар. Саҥа сылга үктэнээт, козалара төрүөҕү биэрэн барда.

Ньурбачаан орто оскуолата 2009 сылтан агропрофилированнай хайысхаламмыта. Араас көтөртөн саҕалаан козаҕа тиийэ дьиэ кыылын иитэллэр. Тохсунньу маннайгы күннэриттэн саҕалаан билигин 12 төбө төрөөн турар, инньэ гынан оскуола 42 козаланна.

«Былырыын 2020 сыл алтынньытыгар саҥа ферма туттан көһөн киирбиппит. Тохсунньу ыйга 12 коза төрөөтө, онон барыта 14 оҕолоохпут. Үксүлэрэ маҥнайгытын төрүүр буолан биирдии оҕолоохтор. Туруктара үчүгэй. Сарсыҥҥаттан ийэлэриттэн араартыахтаахпыт», — диэн Ньурбачаан орто оскуолатын маастара Марианна Андреева кэпсээтэ.

Коза ферматыгар сүнньүнэн икки киһи үлэлиир, кинилэргэ оскоула үөрэнээччилэрэ көмө буолаллар. Күннээҕи көрүүнү-истиини таһынан сайынын окко кытары көмөлөһөллөр. Онус кылаас үөрэнээччитэ Аман Николаев бизнес-инкубатор бастыҥ көмөлөһөөччүтэ. Күннэтэ кэлэн саҥа төрөөбүт коза оҕолорун бүөбэйдиир.

«Манна ийэм үлэлиир. Мин манна күҥҥэ үстэ кэлэн көмөлөһөбүн. Аһатабын, саахтарын ыраастыыбын, харбыыбын», — диэн Ньурбачаан орто оскуолатын 10-с кылааһын үөрэнээччитэ Аман Николаев диэтэ.

Оскуола былырыын бу үлэтинэн 500 тыһыынчалаах улуус гранын ылбыта. Бу үбүнэн оборудование ылынан мантан саас коза үүтүттэн араас бородууксуйаны оҥорон атыыга таһаарар былааннаахтар.

«Үүт бородууксуйатын оҥорон таһаарар сыаллаах-соруктаах бырайыак көмүскээн улуус гранын ылбыппыт. Онон үүтү сойутар, пастеризациялыыр, ыыр аппараттары сакаастаан олоробут», — диэн оскуола дириэктэрэ Николай Егоров кэпсээтэ.

Коза ферматыгар төрүөх элбээн үлэ күөстүү оргуйар. Төрүөхтэр туруктара учугэй. Билигин да өссө төрүөҕү күүтэ сылдьаллар. Онон мантан кэлин төбө ахсаанын элбэтэн үчүгэй ыамы ылан бородууксуйа таһаарарга бэлэмнэнэллэр.