Нуучча шашкатын Россиятааҕы чемпионатыгар Саха сирин кыттааччыта бастаата

Блиц бырагыраамаҕа нуучча шашкатын Россиятааҕы чемпионатыгар Саха сириттэн Николай Стручков кыһыл көмүс мэтээли уонна түргэн шашкаҕа үрүҥ көмүс мэтээл хаһаайынынан буолла.

Николай Стручков НВК «Саха» буҕаалтырынан уонна Саха сиринээҕи шашка Федерациятын толорооччу дириэктэринэн үлэлиир. Кини Аан дойду чемпионатын түөрт төгүллээх кыайыылааҕа, оттон федеральнай таһымҥа үһүс кыайыыта.

«Шашкаҕа үс сааспыттан оонньуубун, бэйэм Саха сиринээҕи шашка Федерациятын толорооччу дириэктэринэн үлэлиибин. Быйылгы чемпионакка олус күүстээх састаап муһунна, кинилэр истэригэр, быһа холоон, 20 гроссмейстер баара», — диэн Николай кэпсээтэ.

Кини 18 очкоттан 15-һин ылан, блиц бырагыраамаҕа кыһыл көмүс мэтээли ылла. Алта түһүмэҕи кыайда уонна үскэ тэҥнэстэ.

«Кыайбыппыттан олус үөрдүм. Бастакы кыайыым буолбатах эрээри, маннык күүстээх састаапка кыайыы үөрдэр. Саха сирин сүүмэрдэммит хамаандата чемпионакка олус үчүгэйдик кытта сылдьар. Холобур, кыргыттарга Сандаара Апросимова баар. Кини 14 саастаах оонньооччу эрээри, дьахталлар икки ардыларыгар үс мэтээл хаһаайынынан буолла. Билигин биһиги классическай бырагыраамаҕа ситиһиилэри күүтэбит», — диэтэ Николай.

Россия чемпионата балаҕан ыйын 21 күнүттэн алтынньы 1 күнүгэр диэри Московскай уобаласка ыытыллар, 20-тэн тахса регион спорсменнара кытталлар.