Нуучча тылыгар БКЭ түмүгэ от ыйын 19 күнүгэр биллиэҕэ

2020 сыл от ыйын  6 күнүгэр ыытыллыбыт нуучча тылыгар БКЭ түмүгэ от ыйын 19 күнүгэр биллэрин туһунан  Үөрэх уонна наука министиэристибэтэ иһитиннэрэр.

БКЭ түмүгүн www.check.ege.edu.ru порталга эбэтэр эксээмэн туттарарга бэлиэтэммит үөрэх тэрилтэтиттэн билсиэххэ сөп.

Сыананы кытта сөпсөспөт түгэҥҥэ апелляцияны 2020 сыл от ыйын 20 уонна 21 күннэригэр бэлиэтэммит үөрэх тэрилтэтигэр биэриэххэ сөп. Быйыл оскуоланы бүтэрээччилэр эксээмэн туттарарга көҥүл ылбыт, оттон оскуоланы урут бүтэрбиттэр эксээмэн туттарарга бэлиэтэммит сирдэригэр биэрэллэр.

Апелляцияны ылбыт тэрилтэ салайааччыта, эбэтэр эппиэттээх киһи тута оройуоннааҕы үөрэх салалтатыгар, онтон үөрэх салалтата Конфликтнай хамыһыйаҕа ыытар. Апелляцияны өрөспүүбүлүкэтээҕи эксээмэн хамыһыйатын быһаарыытынан интернет нөҥүө РФ сокуонун ирдэбиллэрин тутуһан туран көрүллэр.

Сыананы кытта сөпсөспөт түгэҥҥэ апелляция сокуоннай бэрэстэбиитэл уонна оҕо кыттыылаах ZOOM бырагыраама нөҥүө видео-сибээһинэн ыытыллыаҕа.

Онлайн көрүү  салайааччыта уонна эппиэттээх ыытааччыта апелляцияҕа биэрбит оҕоҕо эбэтэр төрөппүккэ онлайн көрүү  буолар күнүн, бириэмэтин биллэриэхтээх.

Апелляцияҕа биэрбит оҕо тэрээһин буолуо 15 мүнүүтэ иннинэ паспорын илдьэ кэлэр.

Онлайн көрүү күнүгэр оройуоҥҥа, куорат эргин сибээс, уот мөлтөх эбэтэр суох буолар түгэнигэр Конфликтнай хамыһыйа апелляцияны бэйэтэ көрөр.