Оҕо төлөбүрүгэр сайабылыанньа балаҕан ыйын 30 күнүгэр диэри хомуллуоҕа

Пенсия пуондатын нөҥүө бэриллэр оҕо төлөбүрүгэр сайабылыанньа балаҕан ыйын 30 күнүгэр диэри хомуллуоҕа. Бу туһунан СӨ Үлэҕэ уонна социальнай сайдыыга министиэристибэтэ иһитиннэрэр.

Пенсионнай пуонда Саха сиринээҕи салаатын көрдөрүүтүнэн, 5 тыһыынчалаах ыйдааҕы төлөбүрү ыларга 38 943 сайабылыанньа бигэргэннэ. 10 тыһыынча кээмэйдээх төлөбүр 194 600 оҕоҕо бэрилиннэ. От ыйынааҕы эбии төлөбүрү кытта уопсайа 2,5 миллиард солкуобай ааҕылынна.

Бу төлөбүрдэр 0 сааһыттан 16-гар диэри саастаах оҕлорго 2020 сыл муус устар ыйыттан бэриллэллэр. Тустаах төлөбүрү ыларга төрөппүттэр сайабылыанньаны судаарыстыбаннай өҥө порталын, эбэтэр Пенсионнай пуонда Саха сиринээҕи салаатын нөҥүө биэриэхтэрин сөп.

Бу төлөбүрү көрүүгэ-истиигэ сылдьар уонна оҕо дьиэтигэр олорор оҕолор эмиэ туһанар бырааптаахтар. Бу түгэҥҥэ сайабылыанньаны көрөөччү уонна сокуоннай бэрэстэбиитэл биэрэр.