Оҕолор төлөбүрдэрин оҥорууга эбии 62 млрд.солк. көрүллүө

Россия премьер-миниистирэ Михаил Мишустин үстэриттэн сэттэлэригэр диэри саастаах оҕолорго эбии төлөбүрү оҥорууга эбии 62 миллиард солкуобай кэриҥэ үбү көрөр туһунан дьаһалы бигэргэттэ. Бу туһунан ТАСС иһитиннэрэр.

«Ыйдааҕы эбии төлөбүрдэри оҥорууга регионнарга эбии 62 миллиард солкуобай кэриҥэ ыытыллыаҕа», — диэн этиллэр.

Көрүллэр эбии төлөбүр кээмэйэ региоҥҥа олохтоммут тиийинэн олоруу алын кээмэйин 50 %-гар тэҥнэһэн, ол эбэтэр регионуттан көрөн быһа холоон ыйга 5,5 тыһыынча солкуобайга төлөнөр.

Инники дойду бырабыыталыстыбатын сүбэ мунньаҕар премьер-миниистир үстэриттэн сэттэлэригэр диэри саастаах оҕолоох дьиэ кэргэттэргэ эбии төлөбүрү оҥорууга 2020 сылга уопсайа 123 миллиард солкуобай ыытылларын туһунан иһитиннэрбитэ.