Оҕону иитиигэ «Реджио» диэн саҥа ньыма туһаныллар буолла

Дьокуускайга оҕону оскуола иннинээҕи альтеративнай үөрэхтээһин маҥнайгы өрөспүүбүлүкэтээҕи конференцията ыытылынна.

Хас биирдии омук оҕону иитиитин ньымата араас. Дьоппуон оҕотун биэһигэр диэри хааччахтаабат, тугу баҕарбытын оҥорор. Онтон биэһин туолла да кытаанах хонтуруолга киллэрэр. Кытайга төттөрүтүн, кыра эрдэхтэриттэн үлэҕэ, улахан дьоҥҥо убаастабыллаахтык сыһыаннаһарга үөрэтэллэр. Шведтар уонна американецтар оҕолоругар улахан киһилии сыһыаннаахтар — кини баҕатын истэллэр, олоҕор орооспоттор. Италияҕа дьиэ-кэргэҥҥэ сүгүрүйүү ытыктанар. Бу дойдуга оҕо бэйэтэ туспа ураты киһи быһыытынан сайдарыгар көҥүлү биэрэллэр. Дэлэҕэ даҕаны Италияҕа оҕону иитиигэ араас методикалар төрүттэниэхтэрэ дуо?

«Монтессори» көрүҥү ааһан, Саха сиригэр «Реджио» диэн саҥа альтернативнай үөрэхтээһин көрүҥэ саҥардыы тарҕанан, дьон кулгааҕар иһиллэр буолан эрэр.

Бу ньыманы Дьокуускайдааҕы «Уу-чукучук» оҕо уһуйаана аан маҥнайгынан Саха сиригэр аҕалан, оҕолору иитэр. Бу саҥа көрүҥү атын уһуйааннарга билиһиннэрээри, бэйэлэрин уопуттарын атыстаһаары «Уу-чукучук» уһуйаан уонна С.Н. Донской-II аатынан Үөрэх сайдыытын уонна квалификацияны үрдэтии института I өрөспүүбүлүкэтээҕи конференцияҕа улуус уһуйааннарын иитээччилэрин, сэбиэдиссэйдэрин түмтүлэр.

«Биһиги уһуйааммыт уонча сыл үлэлээбитин тухары араас ньыманы туһанан, боруобалаан кэллибит. Иитээччилэрбит куруук семинардарга, куурустарга үөрэнэллэр. Оннук биир командировкаттан сүрүн иитээччибит Римма Георгиевна наһаа үчүгэй ньыманы булан, истэн кэллим диэн кэпсээбитэ. Онуоха биһиги харахпыт умайан, маны туһаныахха, биһиги оҕолорбутугар бу табыгастаах буолсу диэммит, кыралаан «Реджио» ньыматын туһанан киирэн барбыппыт», — диэн «Уу-чукучук» уһуйаан сэбиэдиссэйэ Олеся Тимофеева иһитиннэрдэ.

«Реджио Эмилия диэн Италияҕа баар куорат аата. Манна Аҕа Дойду иккис сэриитин кэнниттэн, дьон санаата саппаҕырбытын аһардаары, оҕолорбутун көҥүл санааҕа, бэйэлэрэ толкуйдуур дьоҕурдаах, аһаҕас санаалаах дьон гына иитиэххэйиҥ диэн биир санааҕа кэлэннэр, бу методика толкуйдаммыт. Оҕоҕо аҥардастыы мөҕө-этэ сылдьан, билиини кут да кут буолбакка эрэ, кини толкуйдуур дьоҕурун сайыннаран, бэйэтиттэн билиини хостуохтаапыт. Ол аата, улахан киһи оҕоҕо чинчийэр, айар эйгэни тэрийиэхтээх, ыраахтан олорон ыйытан, ыйан-кэрдэн биэриэхтээх. Мин кэтээн көрүүбүнэн, бу методика оҕоҕо наһаа барсар, ордук саха оҕотугар. Ол эрээри, олоххо үчүгэйдик киирэригэр улахан киһи, төрөппүт, иитээччи санаата уларыйыан наада, кини философскайдык сыһыаннаһара ирдэниллэр. Биһиги оҕону наһаа хааччахтыыбыт, киниэхэ анаан наһаа элбэхтэ саҥарабыт, үөрэтиэхпитин эрэ баҕарабыт. Оттон реджио методикаҕа араас оҥоһуктар, чинчийэр үлэлэр нөҥүө оҕо бэйэтин кыаҕа,толкуйдуур дьоҕура арыллыахтаах», — диэн «Реджио» ньыматын иитээччи Римма Матвеева кэпсээтэ.

Конференцияҕа уонча куорат уһуйааннара, Намтан, Покровскайтан, Чурапчыттан, Амматтан, Уус-Алдантан кэлэн уопут атыстаһан «Реджио» ньыманы кытта билистилэр.