Оҕунан ытыыга Саха сирин чемпионатыгар Чурапчы спортсменнара кыһыл көмүс мэтээллэри ыллылар

Тохсунньу 12-16 күннэригэр киин куоракка ыытыллыбыт оҕунан ытыыга өрөспүүбүлүкэ чемпионатыгар Чурапчы спортсменнара кыһыл көмүс мэтээллэри ылары ситистилэр. Бу туһунан улуус дьаһалтатын пресс-сулууспата иһитиннэрэр.

«Үгэс буолбут оҕунан ытыы» хайысхаҕа бэтэрээннэр икки ардыларыгар эр дьоҥҥо бастакы миэстэни Николай Васильев, кыһыл көмүс мэтээли Эльвира Ефимова ыллылар. Маны таһынан, хамаанданан бастыыр иһин күрэхтэһиигэ иккис миэстэҕэ Галина Филиппова таҕыста.

Блочнай ох саанан ытыыга күрэхтэһиигэ кыһыл көмүс мэтээли Асим Павлов, Борис Баишев уонна Николай Новгородов састааптаах Чурапчы эр дьонун хамаандата ылла. Өссө биир кыһыл көмүһү — Асим Павлов уонна Жанна Кириллина састааптаах хамаанда ылары ситистэ.

Биирдиилээн бастыыр иһин күрэхтэһиигэ Асим Павлов эмиэ «кыһыл көмүһү» ылары ситистэ, онон үс төгүллээх чемпион аатын сүктэ.

«Чурапчыга оҕунан ытыыга үөрэтии сэбиэскэй кэмтэн саҕаламмыта. 70-с сылларга биһиги спортсменнарбыт өрөспүүбүлүкэҕэ бастыҥнар этэ. Улууспутугар туспа оҕунан ытыы Федерацията тэриллэн үлэлиир. Билигин чурапчытааҕы спорткомплекска оскуола оҕолоругар уонна улахан дьоҥҥо аналлаах секция үлэлиир. Оҕунан ытыыга өрөспүүбүлүкэ оҕолоро кэлэн үөрэнэллэр», — диэтэ Чурапчы улууһун сүүмэрдэммит хамаандатын тренерэ Михаил Филатов.

Сотору кэминэн, Чурапчы оҕунан ытааччылара улахан күрэхтэһиилэргэ кыттары былаанныыллар.

Ол курдук, тохсунньу 22 күнүттэн Орел куоракка оҕунан ытыыга Россия Кубога уонна РФ чемпионата буолара күүтүллэр. Саха сирин сүүмэрдэммит хамаандатыгар Асим Павлов, Николай Васильев, Эльвира Ефимова уонна Галина Филиппова киирдилэр.