Оҕуруот аһын уонна фрукта сыаната намтаан эрэр

Уһук Илиҥҥи уокурукка оҕуруот аһын уонна фрукта сыаната намтааһына бэлиэтэнэр. Бу туһунан ТАСС иһитиннэрэр.

«Тохсунньу бүтүүтэ — олунньу саҥата Россия уонна Кытай кыраныыссата сабыллыбытынан сибээстээн, оҕуруот аһыгар уонна фруктаҕа сыана үрдээһинэ бэлиэтэммитэ. Билиҥҥи күн туругунан таһаҕас тиэйэр массыналар сырыылара сөргүтүлүннэ, сыана таһыма оннугар түһэн эрэр», — диэн Россия тыатын хаһаайыстыбатын миниистирин солбуйааччы Оксана Лут эттэ.

Ону тэҥэ, министиэристибэҕэ Уһук Илиҥҥи уокурукка оҕуруот аһын үүннэрээччилэри өйөөһүн миэрэлэрин тэрийии боппуруоһа көрүллэрин туһунан бэлиэтээтэ.

Инники этиллибитинэн, дойду бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Федеральнай антимонопольнай сулууспаҕа сыананы хонтуруоллуурга уонна олоҕо суох үрдэтиини тохтотор туһунан соруйбута.

Сонуну киэҥник тарҕатар сулуспалар Кытайтан таһаҕас киириитэ кылгас кэмҥэ хааччахтаммытынан сибээстээн, Уһук Илиҥҥи уокурукка оҕуруот аһыгар уонна фруктаҕа сыана үрдээбитин туһунан иһитиннэрбиттэрэ.