Ойуур баһаардарын иэнэ 373 гаанан улаатта

Саха сиригэр баар ойуур баһаардарын уопсай иэнэ 373 гаанан улаатта. Бу туһунан ЫБММ өрөспүүбүлүкэтээҕи салаатын пресс-сулууспата иһитиннэрэр.

Авиалесохрана суһал иһитиннэриитинэн, бүгүҥҥү күҥҥэ өрөспүүбүлүкэ сиригэр-уотугар уопсайа 1289 га иэннээх сиргэ 25 ойуур баһаара бара турар. Бүтэһик сууккаҕа сэттэ саҥа уот турда уонна алта умуруорулунна.

Уоту утары охсуһууга суукка иһигэр 450 киһи уонна 99 тиэхиньикэ кыттыыны ылла.

Сөҥүү суоҕунан, ону тэҥэ хотуттан уонна хотугулуу-арҕааттан үрэр тыал күүһүрүөн сөптөөҕүнэн Хаҥалас, Чурапчы уонна Амма улуустарын 12 нэһилиэнньэлээх пуунун ойуур баһаардарын буруота бүрүйүөн сөбө сабаҕаланар.