Оkko сервиска саха киинэтин балаһата баар буолла

Оkko мультимедийнай сервиска саха киинэлэрин балаһата баар буолла. Бу туһунан «Саха» НКИХ иһитиннэрэр.

«Саха киинэлэрэ аан бастакытын Россия мультимедийнай сервиһыгар таҕыстылар. Бу биһиги салаабытыгар эрэ буолбакка, өрөспүүбүлүкэ киинэ устааччыларыгар барыларыгар ураты түгэн буолар. «Сахафильм» хампаанньа бэрэстэбиитэллэрин кытта түргэн уонна таһаарыылаах үлэбит түмүгэр, Сбербанк бу бырайыагын оллоххо киллэрдибит. Мантан ылата Сбербанк бөлөҕөр киирэр Okko сервис хас да мөлүйүөнүнэн ахсааннаах көрөөччүлэрэ саха киинэтин ураты, чаҕылхай эйгэтигэр сыстар кыахтаннылар», — диэн Сбербанк ПАУо Байкаллааҕы баанын Саха сиринээҕи салаатын салайааччыта Алексей Зезюлин кэпсээтэ.

Бу Оkko-ҕа тахсыбыт бастакы региональнай киинэ коллекцията буолар. Билигин саха киинэтин балаһатыгар 20 хартыына киирдэ: «Бэйбэрикээн», «Республика Z», «Гектар», «Ильмень үрдүнэн туруйалар», «Кэскил 3. Нэһилиэстибэ» уо.д.а.

Саха киинэтэ Россия киноматографын ураты көстүүтэ буолар, саха режиссердарын хартыыналара бүтүн россиятааҕы уонна аан дойдутааҕы киинэ бэстибээллэригэр наҕараадалары ылаллар. Холобура Эдуард Новиков «Тойон кыыл» («Царь-птица»)(«Святой Георгий» көмүс бирииһэ) уонна Любовь Борисова «Мин үрдүбэр күн хаһан да киирбэт» («Надо мною солнце не садится») (көрөөччү биһирэбилин бирииһэ) москватааҕы норуоттар икки ардыларынааҕы киинэ бэстибээлигэр бэлиэтэммиттэрэ.

Режиссер Дмитрий Давыдов «Чуучала» («Пугало») этно-драма хайысхалаах хартыыната бүтүн Россиятааҕы «Кинотавр» киинэ бэстибээлин сүрүн куонкуруһугар көһүннэ.