Олена Подлужная-Уутай Москваҕа «Тотальнай дьыктаан-2021» дикторынан буолуоҕа

Этническай музыканы толорооччу Олена Подлужная-Уутай Москваҕа «Тотальнай дьыктаан-2021» сырдатар аахсыйаҕа диктордыаҕа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Кини тиэкиһи өрөспүүбүлүкэ постпредствотын дьиэтигэр кыттааччыларга ааҕыаҕа, бу аахсыйа былаһааккаларыттан биирдэстэрэ.

Москваҕа барыта 200-тэн тахса дьыктааны суруйар миэстэ тэриллиэҕэ, оттон диктордарынан биллиилээх көрдөрөр-иһитиннэрэр хампаанньалар журналистара, музыканнар уонна култуура деятеллэрэ буолуохтара: Владимир Познер, Алена Долецкая, Антон Долин, Николай Цискаридзе, Влад Лисовец, Юрий Быков уо.д.а. Кинилэр бары Дмитрий Глуховскай «Обещания»айымньытын ааҕыахтара.

Аахсыйа сүрүн былаһааккатынан Өксөкүлээх Өлөксөй аатынан норуоттар доҕордоһууларын дьиэтэ буолуоҕа, онно тиэкис ааптара, Россия суруйааччыта Дмитрий Глуховскай, 14:00 чааска «Обещания» айымньытын быһа эпииргэ ааҕыаҕа.

Аан дойдутааҕы «Тотальнай дьыктаан-2021» аахсыйа өрөспүүбүлүкэ 150 былаһааккатыгар ыытыллыаҕа. 

Муус устар 10 күнүгэр буолар, 2021 сыллаахха Россия куораттарыттан Дьокуускайга буолара быһаарыллыбыта.  2020 сылга аахсыйаҕа 270 тыһыынчаттан тахса киһи кытынна уонна 1 646 былаһааккаҕа 45 дойду кыттыыны ылла.