«Олоҥхо дойдутун дьоруойдара» кинигэ электроннай көрүҥүнэн таҕыста

ϴрөспүүбүлүкэтээҕи норуот айымньытын Дьиэтин издательскай-фондовай отдела Улуу Кыайыы 75 сылыгар анаан «Герои земли Олонхо» электроннай форматтаах кинигэни бэйэтин сайтыгар таһаарда. Бу туһунан тэрилтэ пресс-сулууспата иһитиннэрэр.

Кинигэҕэ отдел үлэһиттэрэ өрөспүүбүлүкэбит 14 улууһуттан култуура эйгэтигэр үлэлээбит сэрии кыттыылаахтарын, бэтэрээннэрин туһунан хомуйбут сэдэх матырыйааллара киирдилэр. Манна араас сылларга үлэлээн-хамсаан ааспыт култуура Дьиэлэрин араас үлэһиттэрин, ааҕар балаҕаннар уонна кыһыл чуумнар сэбиэдиссэйдэрин, библиотекалар уонна музейдар үлэһиттэрин, киномеханиктар тустарынан кинилэр аймахтарын, чугас дьоннорун, бииргэ үлэлээбит, алтыспыт үөлээннээхтэрин ахтыылара, сэрии кыттыылаахтарын биографическай чахчылара тиһилиннилэр. Кинигэ сүрэхтэниитэ Кыайыы күнүгэр – бу сыл ыамыйын 9 күнүгэр – онлайн форматынан ыытыллыбыта.

Кинигэ саҥардыллар, эбии таһаарыллар форматтааҕынан билиҥҥи кэмҥэ кинигэҕэ киирэ илик матырыйааллар улуустартан эбии хомулла тураллар.