Олоҥхо тыйаатыра саҥа дьиэҕэ көстө

Искусство уонна эпос Арктическай киинэ тутуллуор диэри Олоҥхо тыйаатыра  Өксөкүлээх Өлөксөй аатынан норуоттар доҕордоһууларын дьиэтигэр көстө. Бу туһунан СӨ култуура уонна духуобунай сайдыы министиэристибэтин пресс-сулууспата иһитиннэрдэ.

Саҥа сыанаҕа аан бастаан Алексей Кулаковскай — Өксөкүлээх Өлөксөй «Ойуун түүлэ» испэктээгин премьерата туруо, диэн бэлиэтииллэр.

«Олоҥхо тыйаатыра көстө. Манна биһиэхэ араас сиртэн көмө оҥоһуллар. Сүрүнэ, бэйэбитигэр улахан сыаналанныбыт. График быһыытынан саҥа дьылтан саҕалаан үлэлээн барыахпыт», — диэн тыйаатыр толорооччу дириэктэрэ Мария Турантаева тылын тиэрдэллэр.

Сэтинньи 25 күнүгэр Олоҥхо Декадата саҕаланна.  Өрөспүүбүлүкэ үрдүнэн күннэтэ араас хабааннаах тэрээһиннэр, кэнсиэрдэр, кинигэлэр сүрэхтэниилэрэ, быыстапкалар, билим кэмпириэнсийэлэрэ уонна испэктээктэр ыытыллыахтара.