Олунньу 13 күнүгэр Ийэ тыл уонна сурук-бичик күнэ бэлиэтэнэр

Бүгүн, олунньу 13 күнүгэр Саха сирин олохтоохторо Ийэ тыл уонна сурук-бичик күнүн бэлиэтииллэр. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Саха сирин олохтоохторун бэлиэ күнүнэн Ил Дархан Айсен Николаев эҕэрдэлээтэ.

«Бүгүн, саха норуотун үөрэхтээһиҥҥэ сүҥкэн оруоллаах, сахалыы маассабай суругу-бичиги айбыт, уһулуччулаах сырдатааччы, лингвист-учуонай Семен Андреевич Новгородов төрөөбүт күнэ. Бу бэлиэ күҥҥэ биһиги сахабыт тылыгар сүгүрүйэрбитин, төрдүбүтүнэн-ууспутунан киэн туттарбытын биллэрэбит. Ийэ тыл өбүгэ муудараһын, норуот култууратын тута сылдьар буолан, киһиэхэ күүһү-уоҕу уонна инникигэ эрэллээх буолууну саҕар», — диэтэ кини.

Өрөспүүбүлүкэҕэ хас да тылы дьүөрэлии тутан үөрэтиигэ ураты болҕомто уурулларын туһунан Айсен Николаев бэлиэтээтэ.

Мантан сиэттэрэн, өрөспүүбүлүкэ норуоттарын тылларын сайыннарыы уонна харыстааһын биир кэлим судаарыстыбаннай бырагыраамата олоххо киирэр.

Маны таһынан, оҕону төрөөбүт тылынан үөрэтии научнай, методическай тирэхтэрэ сайдаллар. Төрөөбүт тылы цифровой эйгэҕэ киллэрии хайысхатыгар улахан болҕомто ууруллар.

Тылы сайыннарыыга көмөлөһөр сыалтан Национальнай бэчээт күнэ олохтонно, маассабай ааҕыыны көҕүлээһин ыытыллар, төрөөбүт тылынан кинигэлэри таһаараллар.

«Россия регионнарыгар ааҕыыга Саха сирэ инники күөҥҥэ сылдьар. Төрөөбүт тылга харыстабыллаахтык сыһыаннаһыы хас биирдиибит иэһэ. Биир кэлим өйүнэн-санаанан эрэ биһиги ийэ тылбытын харыстыыр кыахтаахпыт», — диэн Ил Дархан бэлиэтээн эттэ.