Онлайн-сэрэбиэй түмүгүнэн 1200-тан тахса булчут көҥүл ылла

Бүгүн хааччахтаммыт булт көрүҥнэригэр көҥүл ылыы сэрэбиэйэ өрөспүүбүлүкэҕэ маҥнайгытын онлайн быһыылаах ыытылынна. Бу туһунун СӨ экологияҕа министиэристибэтин пресс-сулууспата иһитиннэрэр.

«Электроннай сэрэбиэйгэ кыттыыга муус устар 1 күнүттэн от ыйын 30 күнүгэр диэри барыта 13 624 сайабылыанньа киирдэ. Олортон 11 873 сайабылыанньа бүгүҥҥү тыырыыга кыттыыны ылла, 1200-тан тахса булчут лицензиялары ылыахтара», – диэн этиллэр.

Онтон атыттар булт көҥүлүн сайабылыанньа киириитин бэрээдэгинэн ылаллара бэлиэтэнэр.

Оройуоннарынан, булт баайын көрүҥнэринэн уонна саастарын ситиилэринэн уопсайа 148 лот оҥоһулунна.

Түмүк иһитиннэрии биир үлэ күнүн иһигэр хас биирдии кыттааччыга өрөспүүбүлүкэтээҕи судаарыстыбаннай уонна муниципальнай өҥөлөр порталларыгар баар тус кэбиниэт нөҥүө ыытыллыаҕа. Кытааччы порталга регистрацияламматах буоллаҕына, биэс күн иһигэр ыйыллыбыт көрүҥүнэн тириэрдиллиэҕэ.

Бултка көҥүл ылбыт дьон портал нөҥүө 2020 сыл атырдьах ыйын 3 күнүттэн 31 күнүгэр диэри хантан уонна хаска кэлэн ылалларын ыйар сайабылыанньа суруйаллара ирдэнэр.

Электроннай сэрэбиэй түмүгүн кытта экология министиэристибэтин сайтыгар билсиэххэ сөп.