Орловскай уобаластан 100-тэн тахса төбө сүөһүнү Сунтаарга аҕаллылар

Орловскай уобалас племенной хаһаайыстыбаларыттан 120 төбө симментальскай боруода сүөһүнү Сунтаар улууһун Илимниир сэлиэнньэтигэр аҕаллылар. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрэр.

«Ынах сүөһү анал тырааныспарынан 18 күн устата 10 тыһыынчаттан тахса килэмиэтирдээх айаны этэҥҥэ аһарда. Кэлиэхтэриттэн 30 хонуктаах профилактическай карантиҥҥа туруорулуннулар», — диэн этиллэр.

Ынахтар 2020 муус устар ыйыгар тэриллибит «Ил-Тосхол» тыа хаһаайыстыбатын кооперативыгар анаан кэллилэр. Племенной сүөһүнү аҕалыы нэһилиэнньэни бэйэ оҥоруу үүт бородууксуйатынан хааччыйар, ассортимены кэҥэтэр, ону тэҥэ улуус тыатын хаһаайыстыбатын салаатын балаһыанньатын тупсарар кыаҕы биэрэр.

Улуустааҕы тыа хаһаайыстыбатын управлениетын салайааччыта Иван Тихонов тириэрдэринэн, Илимнииргэ билигин хотон тутуута бара турар. 2021 сылга кооператив тыа хаһаайыстыбатын министиэристибэтин бырагыраамаларын иитинэн хотон тутуутун, племенной сүөһүнү ылыы уонна бааһыналары чөлүгэр түһэрии ороскуотун сорох чааһын толуйуу куонкурустарыгар кыттар санаалаах.

Кооператив салалтата Сунтаар сэлиэнньэтигэр үүт сыаҕын тутар, Аллыҥаҕа тыа хаһаайыстыбатын кэҥэтэр уонна быраҕыллыбыт бааһыналары сөргүтэр былааннаах.