«Орто Дойду» зоопарка үрүҥ эһэлэр оҕолорун аатын талыы куонкуруһун биллэрдэ

«Орто Дойду» зоопарка СӨ экологияҕа министиэристибэтин уонна «Роснефть» хампаанньаны кытта бииргэ Колымана уонна Ломоносов үрүҥ эһэлэр былырыын ахсынньы ыйга төрөөбүт оҕолорун аатын талыы куонкуруһун биллэрдилэр. Бу туһунан СӨ экологияҕа министиэристибэтин пресс-сулууспата иһитиннэрэр.

«Бары баҕалаахтар ыам ыйын 17 күнүттэн — бэс ыйын 1 күнүгэр диэри бэйэлэрин этиилэрин «Орто Дойду» зоопарка социальнай ситимнэригэр, маны тэҥэ «Роснефти» хампаанньа Instagram уонна Вконтакте социальнай ситимнэргэ баар официальнай аккауннарыгар суруйуохтарын сөп. Куоластааһын түмүгүнэн талыллыбыт үрүҥ эһэ оҕотун аатын, бэй ыйын 5 күнүгэр бэлиэтэнэр тулалыыр эйгэ күнүгэр биллэриэхтэрэ», — диэн зоопарка научнай-сырдатар салаатын салайааччыта Наталья Сафонова кэпсээтэ.

Бү үрүҥ эһэ оҕотун атын талыыга ыытыллар иккис куонкурус буолар. Маҥнайгы 2017 сыллаахха ыытыллыбыта, өрөспүүбүлүкэ олохтоохторуттан киирбит тыһыынчаттан тахса этииттэн Хаарчаана диэн аат талыллыбыта. Быйын куонкурус бүтүн Россия үрдүнэн ыытыллар.

Санатар буоллахха, быйыл муус устар 3 күнүгэр үрүҥ эһэ оҕото арҕахтан тахсыытын «Орто Дойду» зоопарка социальнай ситимнэригэр быһа эфиргэ көрдөрбүтэ.