Орто Халымаҕа ЧС эрэһиимэ биллэрилиннэ

Среднеколымскай куоракка Халыма өрүс уутун таһыма 1215 сантиметрга диэри тиийдэ, кутталы үөскэтэр көрдөрүү 1200 сантиметртан саҕаланар. Бу туһунан Ил Дархан Айсен Николаев брифинг кэмигэр иһитиннэрдэ.

«Түүн устата мууһу эһии үлэтэ ыытылынна. Уопсайа биэс дэлби тэптэрии оҥоһулунна. Түөр туонна кэриҥэ дэлби тэптэрэр матырыйаал баранна. Ыытыллыбыт үлэ түмүгэр муус хайынна. Халаан уутун таһыма намтаан эрэрэ бэлиэтэнэр. Билигин уу таһыма 1215 сантиметрга тэҥнэһэр», — диэн Айсен Николаев бэлиэтээтэ.

Бүгүн, ыам ыйын 21 күнүгэр Орто Халымаҕа муниципальнай таһымнаах ыксаллаах балаһыанньа эрэһиимэ биллэрилиннэ.

Инники этиллибитинэр, Россия ыксаллаах быһыыга-майгыга министиэристибэтин өрөспүүбүлүкэтээҕи салаатын 20 үлэһитэ Орто Халыма уонна Үөһээ Халыма улуустарыгар ыытыллыбыттара.