Орто Халымаҕа оҕо искуустубатын киинэ аһылынна

Бүгүн, олунньу 7 күнүгэр, Орто Халыма куоратыгар оҕо искуустубатын киинин аһыллыыта ааста. Бу туһунан СӨ култуураҕа уонна духуобунай сайдыыга министиэристибэтэ иһитиннэрэр.

Инники үөрэх кыһата хаарбах туруктаах эбийиэктэргэ олорон үлэлээбитэ. Саҥа оскуоланы тутуу үлэтэ 2014 сылтан «Сахам сирэ XXI-с үйэҕэ» бүтүн өрөспүүбүлүкэтээҕи үтүө дьыала хамасааһынын иитинэн ыытылынна. Дьиэ тутуутугар 74 мөлүйүөн солкуобай көрүллэн 752 квадратнай миэтэрэ иэннээх оскуола баар буолла.

2019 сылга «Култуура» национальнай бырайыак иитинэн 4,2 мөлүйүөн солкуобай суумалаах саҥа оборудованиялар уонна музыкальнай инструменнары: икки пианино, рояль, 12 баян ыллыллыбыттара.

Билигин муусука оскуолатыгар 190 оҕо дьарыктанар. Үөрэнээччилэр хореография, фортепианно, баян, декоративно-прикладной уонна художественнай искуустуба хайысхаларыгар уһуйуллаллар.