Орто Халыма аэропордун балаһатын уу ылла

Орто Халыма куорат аэропордун көтөр-түһэр балаһатын сааскы халаан уута ылла. Бу туһунан өрөспүүбүлүкэтээҕи суһал штаб иһитиннэрэр.

«Бэҕэһээҥҥиттэн мууһу эстэрии үлэлэрэ ыытыллаллар, биэс дэлби тэптэрии оҥоһулунна, 3780 киилэ матырыйаал туһанылынна. Халыма өрүскэ муус харыыта туоратылла илик, уу таһыма кутталы үскэтэр таһымтан үрдүк», — диэн этиллэр.

Ыам ыйын 21 күнүн туругунан 12 тиэргэни, култуура пааркатын, хас да уулуссалары сааскы халаан уута ылла. Уу ылбыт дьиэлэриттэн 46 киһи аймахтарыгар көһөрүлүннүлэр.

Быһыты бөҕөргөтүүгэ 850 кууб гравий уонна 2 000 куул кумах бэлэмнэннэ. Дьокуускайтан эбии дэлби тэптэриини оҥорор матырыйааллаах сөмөлүөт көттө.

Муома улууһун Соболоох сэлиэнньэтигэр эмиэ уустук балаһыанньа олохтонно. Индигиир өрүскэ муус харыыта ааһа илик. Уу ылбыт аҕыс дьиэтиттэн 33 киһини, 35 сүөһүнү уонна уон сылгыны көһөрөр туһунан быһаарыы ылылынна.

Хонуу сэлиэнньэтигэр уу таһыма үрдээһинэ бэлиэтэнэ, нэһилиэнньэ сэрэтилиннэ. Балаһыанньа хонтуруолга тутуллар.

Өрөспүүбүлүкэ өрүстэрин мууһун хамсааһынын «Половодье 2020» нөҥүө кэтээн көрүөххэ сөп.