Орто Халыма Өлөөкө Күөл, Сыбаатай нэһилиэктэригэр балаһыанньа оннугар түстэ

Орто Халыма Өлөөкө Күөл, Сыбаатай нэһилиэктэригэр тыа баһаарын балаһыанньата оннугар түстэ.

Өлөөкө Күөл нэһилиэгэр үс баһаар баара бэлиэтэнэр. Нэһилиэккэ куттал суоһаабатын туһунан оройуон дьаһалтата иһитиннэрэр.

«Хотуттан күүстээх тыал кэлэр түгэнигэр нэһилиэнньэҕэ кутталы үөскэтиэн сөп. Баһаары утары тэрээһин оҥоһулунна», — диэн оройуон дьаһалтата бэлиэтээтэ.

Баһаары утары  Орто Халыма оройуонуттан  нэһилиэккэ 12 киһилээх биригээдэ, ону тэҥэ ЫБМ аэромобильнай бөлөҕө үлэлиир.

Сыбаатай нэһилиэгэр баар баһаар нэһилиэнньэ уонна ЫБМ аэромобильнай бөлөҕүн көмөтүнэн оннугар түстэ. Билиҥҥи туругунан туорпалаах сир баһаарын умуруоруу үлэтэ ыытыллар.

«Ыстапаан Күөлэ диэн сиргэ баһаары бэҕэһээ умуруордулар. Сир туорпалааҕа балаһыанньаны уустугурдар. Күүстээх тыал баһаары эмиэ күөдьүтүөн сөп», — диэн оройуон дьаһалтата иһитиннэрдэ.