Орто Халыма олохтоохторо бородуукта сыаната үрдүгүн үҥсэллэр

Орто Халымаҕа социальнай бородуукта сыанатын үрдэтии туһунан үҥсүүнү бэрэбиэркэлииллэр. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрэр.

Орто Халыма куоратын олохтоохторуттан министиэристибэ аатыгар «Якутоптторг» акционернай уопсастыба үлэни куһаҕаннык тэрийэрин туһунан үҥсүү киирбит. Чуолаан сыананы үрдэтэрин, болдьоҕо тахсыбыт бородууксуйаны атыылыырын уонна маҕаһыыннарга уочарат үөскүүрүн туһунан.

Хампаанньа бэлиэтииринэн билигин киирбит иһитиннэриинэн бэрэбиэркэ ыытыллар.

«Бырадабыас болдьоҕо тахсара чугаһаабыт бородууксуйаны атыыга таһаарара көҥүллэнэр. Болдьоҕо тахсыбытын кэнниттэн — атыыттан уһуллара ирдэнэр. Биһиги болдьо ааспыт табаары хаһан да атыылыы иликпит», — диэн «Якутоптторг» АУо иһитиннэрэр.

Уочарат үөскүүрүн туһунан үҥсүүнү этэр буоллахха, хампаанньа бу социальнай арыты тутуһууну кытта сибээстээх диэн быһаарар. Тыа хаһаайыстыбатын министиэристибэтэ балаһыанньаны хонтуруолга тутар.