Муус устар 1 күнүттэн Дьокуускай куорат кытыы бөһүөлэктэрин оскуолаларын оҕолоругар оптуобуһунан сырыы босхо буолуоҕа. Бу туһунан киин куорат дьаһалтатын пресс-сулууспата иһитиннэрэр.
Тустаах дьаһалы Дьокуускай мэрин э.т. Евгений Григорьев баттаата.
«Киин куорат кытыы бөһүөлэктэрин оскуолаларыгар үөрэнэр, эбэтэр Дьокуускай чугаһынааҕы бөһүөлэктэргэ олорор, ол эрээри атын уокурук оскуолатыгар үөрэнэр 5-11 (12) кылаас оҕолоругар уопсастыбаннай тырааныспарынан босхо сырыыны хааччыйарга», — диэн этиллэр.
Бу дьаһал социальнай өйөбүл миэрэтин быһыытынан ылыллыбыта бэлиэтэннэр.
