Остуол национальнай оонньууларын бэстибээлэ Тааттаҕа ыытылынна

Бу өрөбүллэргэ остуол национальнай оонньууларыгар маҥнайгы бэстибээл Таатта улууһугар ыытылынна. Хабылык, хаамыска көрүҥэр Манчаары оонньууларыгар хамаанданы сүүмэрдиир күрэххэ биэс нэһилиэк кыттыыны ылла.

Хабылык, хаамыска спорт көрүҥүн быһыытынан аан маҥнай өрөспүүбүлүкэ таһымнаах күрэҕэ 1999 сыллаахха Тааттаҕа буолбут Олоҥхо оонньууларыгар киирбит уонна оҕолорго эрэ анаан ыытыллыбыт.

Ол кэмтэн тохтуу сылдьыбыт оонньуу, иккис тыынын ылан, 2015 сыллаахха Федерация маҥнайгы өрөспүүбүлүкэ таһымнаах улахан күрэҕэ ыытыллыбыт. Күн бүгүн спорт бу көрүҥэ ааспыт 20-с Манчаары оонньууларын испииһэгэр киириэҕиттэн, сайдан эрэр.

Биэс нэһилиэк бастыҥнарын түмпүт улуустааҕы бастакы бэстибээл биэс бөлөҕүнэн ыытылыбыт. Остуолтан барбах эрэ төбөлөрө өндөйөр кырачааннартан саҕалаан, аҕам саастаахтарга тиийэ кытыбыттар. Хабылык, хаамыска омос көрдөххө остуол оонньуута дэннэр да, киһиттэн үгүс сыраны-сылбаны эрэйэр спорт көрүҥэ.

Түмүккэ Ытык Күөл хамаандата кыайыыны ситистэ. Тыараһалар иккис, Уолбалар үһүс миэстэлэри ыллылар. Бастыҥтан бастыҥнар аны, бары күүстэрин Манчаары оонньууларыгар бэлэмнэниигэ уураллар.