От былаанын толорууга эбии 25 мөл.солк. ыытыллыаҕа

Саха өрөспүүбүлүкэтин бырабыыталыстыбата быйылгы от былаанын толорууга эбии 25 мөлүйүөн солкуобайы көрүөҕэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Ил Дархан Айсен Николаев улуустар баһылыктарын кытта ВКС нөҥүө ыыппыт мунньаҕын кэмигэр оттооһун хампаанньатын хаамыытын дьүүллэстилэр.

«Билигин сүрүн сорукпутунан оттооһун былаанын толорор миэрэлэри ылыы буолар. Бастатан туран мобильнай биригээдэлэр үлэлэрин тэрийиэхпитин наада. Өрөспүүбүлүкэ бырабыыталыстыбата бу сыалга эбии 25 мөлүйүөн солкуобайы көрөр туһунан быһарыыны ылла. Сайаапкаларгытын тыа хаһаайыстыбатын министиэристибэтигэр тиксэрэргитигэр көрдөһөбүн. Уонна атырдьах ыйын 20 күнүгэр диэри ыйыллыбыт сириэстибэлэри улуустарга диэри тириэрдэргэ соруйабын», — диэн Айсен Николаев эттэ.

Киин уонна Илин Эҥэр улуустарга кураан, сөҥүүтэ суох күн-дьыл туран от бэлэмнээһин хампаанньатын ыытыыга уустук балаһыанньа олохтонно. Атырдьах ыйын 5 күнүн туругунан өрөспүүбүлүкэҕэ от былаанын 40 %-на туолла. Оттооһуҥҥа 10289 звено тэрилиннэ, 33,5 тыһыынча киһи кыттыыны ылар.

«Тыа хаһаайыстыбатыгар билигин үүт бэлэмнээһинин субсидиялааһын бэрээдэгин уларытар саҥа сокуон бырайыага көрүллэр. Миэстэтигэр төһө кыалларынан элбэх киһи, бу сокуон барылын көрөн ырытыһара уонна саамай сүрүнэ бэйэлэрин этиилэрин киллэрэллэрэ ирдэнэр», — диэн Ил Дархан түмүктээтэ.