«Отмороженная» бырайыак «Рюкзактаах сулус» бириэмийэҕэ номинацияланна

Саха сирин «Отмороженная» айан туһунан бырайыага «Рюкзактаах сулус» («Звезда под рюкзаком») бириэмийэ «Этномедиа» хайысхатыгар номинацияланна.

«Тэрийээччилэр биһиги бырайыакпытын бэйэлэрэ «Этномедиа» номинацияҕа киллэрдилэр. Таһаарыыларбытын көрөн баран, олус интэриэһинэйдик уонна сэргэхтик Саха сиригэр олорор омуктар култуураларын сырдаталларын бэлиэтээтилэр», — диэн «Отмороженная» бырайыак ааптара уонна ыытааччыта Екатерина Карпухина кэпсээтэ.

«Рюкзактаах сулус» бириэмийэ сыалынан айан туһунан сырдатар блогердар, айанньыт-документалистар уонна социальнай бырайыактар көхтөөх туризм хайысхатыгар киллэрэр кылааттарын билинии буолар.

«Отмороженная» бырайыак чэрчитинэн биһиги өрөспүүбүлүкэ 20-тэн тахса улууһугар сырыттыбыт, ол эрээри мин бэйэм инникиттэн Муома улууһугар тиийэ сылдьар баҕа санаалаах этим. Мин санаабар Муома Саха сирин биир саамай кэрэ көстүүлээх улууһунан буолар», — диэн Екатерина Карпухина санаатын үллэһиннэ.

«Отмороженная» айан туһунан кэпсиир биэриилэр өрөспүүбүлүкэ ханаалларыгар 2016 сыл олунньу ыйыттан көстөллөр. Хас биирдии таһаарыыга тэрийээччилэр Саха сиринэн айан бары өрүтүн сырдаталлар: маршруту ууруу, бүддьүөтү ааҕыы, сылдьарга булгуччулаах сирдэр, улуустар историческай ыспыраапкалара уонна култуурнай нэһилиэстибэлэрэ.

Атырдьах ыйын 1-25 күннэригэр көрөөччүлэр биһирэбиллэрин бирииһин куоластааһына blogo.ru сайтка ыытыллар. Наҕараадалары туттарыы балаҕан ыйын 4-6 күннэригэр Москва аннынан баар Гуслица арт-уһаайбаҕа айанньыт-блогердар слеттарыгар ыытыллыаҕа.