Педагогическай вакансия дьаарбаҥкатыгар 600-тэн тахса устудьуон кытынна

Сыл ахсын ыытыллар үрдүк үөрэх кыһаларын уонна колледжтарын бүтэрээччилэргэ өрөспүүбүлүкэтээҕи педагогическай онлайн- дьаарбаҥка 600- тэн тахса үлэ көрдөнөөччүнү түмтэ. Бу туһунан СӨ үөрэҕин министиэристибэтин пресс-сулууспата иһитиннэрэр.

«2021-2022 үөрэх дьылыгар үлэ биэрээччилэр 854 вакансияны туруордулар. Ону тэҥэ, үлэҕэ киирэргэ аадырыстаах көмөнү уонна методическай өйөбүлү оҥоробут диэн бэлиэтиэхпин баҕарабын», — диэтэ өрөспүүбүлүкэ үөрэҕин уонна наукатын министрин бастакы солбуйааччы Михаил Присяжнай.

Дьаарбаҥкаҕа барыта 11 хайысха баар: гуманитарнай, ойуулуур искусство бирэдимиэттэрэ, технология, черчение, музыка, алын кылаас үөрэхтээһинэ, естественнэй бирэдимиэттэр, история, эбии үөрэхтээһин тэрилтэлэрэ уо. д. а. Үлэ биэрээччилэр вакансияларын билиһиннэрдилэр, олорор усулуобуйаларын уонна өйөбүл миэрэлэрин туһунан кэпсээтилэр.

2021 сылга барыта үс тыһыынчаттан тахса устудьуон үөрэҕи бүтэрэрэ күүтүллэр, ол иһигэр 471- һэ педагогическай идэлээхтэр.