Полярнай эргимтэ таһыгар бастакы модельнай библиотека аһылынна

РФ бэрэсэдьиэнэ Владимир Путин көҕүлээбит «Култуура» национальнай бырайыагын чэрчитинэн Булуҥ улууһун Тиксии бөһүөлэгэр бастакы модельнай библиотека аһылынна.

2019 сыллаахха модельнай халыыбынан толору модернизацияны үбүлээһин куонкуруһугар улуустааҕы оҕо библиотекатын Тиксии бөһүөлэгинээҕи филиала кыайбыта уонна биэс мөлүйүөн солкуобайы ылбыта.

«Эһиги национальнай бырайыак дойду саамай уһук туочукатыгар үлэлиирин холобура буолаҕыт. Эһиэхэ үһүттэн 70-гар диэри саастаах ааҕааччы сылдьар. Быйыл Дьокуускайдааҕы уонна эһиги бибилиотекаҕыт национальнай бырайыак көмөтүнэн саҥардылынна. Национальнай бырайыак куонкурустарыгар кыттыыны салҕыы ыытабыт, өссө үс библиотекаҕа биэстии мөлүйүөн тыырылынна», — диэтэ Саха сирин култууратын миниистирэ Юрий Куприянов.

Библиотекаҕа саҥа миэбэл атыыластылар, информационнай терминал турда, кинигэ пуондата саҥардылынна. Ноутбуктаах, проектордаах, интерактивнай дуоскалаах дьиэ кэргэн ааҕар, сынньанар киинэ уонна акустическай систиэмэлээх конференц-саала аһылынна. Интернеттээх, үс киһи үлэлиир компьютернай саалалаах смарт-лаборатория үлэлиир.

«Ааҕааччыларбытыгар тиэкис бэчээттиир, копиялыыр, сканердыыр уонна тиһэр полиграфическай өҥөлөр баар буолуохтара. Өҥнөөх уонна боростуой принтер, элбэх функциялаах устройство уонна сканнер, интерактивнай остуол ыллыбыт. Биһиги баҕа санаабытын толордубут — дьиэ кэргэҥҥэ анаан киин аһылынна, бу бөһүөлэккэ олус суолталаах»,- диэтэ библиотека дириэктэрэ Айталина Иванова.