«Полярные авиалини» авиахампаанньа бөртөлүөтэ тайҕаттан дьону булан ылла

Алтынньы 31 күнүгэр «Полярные авиалини» авиахампаанньа бөртөлүөтэ көтөн иһэн, тайҕаттан муна сылдьар үс эр кини уонна биир дьахтары булан ылла. Бу туһунан авиахампаанньа пресс-сулууспата иһитиннэрэр.

Ми-8 бөртөлүөт Орто Халыма куораттан Березовка бөһүөлэгэр диэри рейсы оҥорон испит. Куораттан 80-ча килэмиэтири айаннаан баран, туох да суол-ис суох сиригэр сатыы дьону бэлиэтии көрбүт. Тиийиэхтээх сиригэр пассажирдарын тиксэрэн баран, бөртөлүөт экипааһа ол сиргэ төннөн, дьону ылар туһунан быыһаарыы ылбыт.

«Бу дьон тутааччылар эбит. Бу иннинээҕи күн Березовка бөһүөлэгиттэн икки снегоходунан айаҥҥа туруммуттар, 50-чэ килэмиэтири айаннаан баран тиэхиньикэлэрэ алдьаммыт. Туох да сибээһэ суох буолан, кутаа уот оттон иттэн баран, сатыы булчуттар үүтээннэрин булан тиийбиттэр.

Дьоллоругар бөртөлүөт тыаһын истэн, аһаҕас сиргэ тахсан биэрбиттэр. Бөртөлүөт пилоттара көрөллөрүн гына кутаа уот умаппыттар.