«Пугало» киинэ аан дойдутааҕы бэстибээл көрөөччү биһирэбилэ бирииһин ылла

Режиссер Дмитрий Давыдов «Пугало» киинэтэ Владивостокка ыытыллыбыт «Чуумпу меридианннара» («Меридианы Тихого») 18–с аан дойдутааҕы киинэ бэстибээлин көрөөччү биһирэбилэ бирииһин ылла.

Бу туһунан Саха сирин үтүөлээх артыыһа, киинэҕэ сүрүн оруолу толорбут Валентина Романова – Чыскыырай бэйэтин Instagram аккаунугар суруйда.

«Бэҕэһээ биһиэхэ Россия бастыҥ киинэтин иһин көрөөччү биһирэбилэ бирииһи туттардылар», – диэн кини эттэ.

«Чуумпу меридианнара» – Россияҕа соҕотох Чуумпу океан кытылын дойдуларыгар эрэ анаан ыытыллар киинэ бэстибээлэ буолар. 2003 сылтан ыла Владивосток куоракка ыытыллар. Бэстибээлгэ сыллата Соҕуруулуу-Илиҥҥи Азия, Хотугу уонна Соҕуруу Америка, ону тэҥэ Чуумпу океан кытылынан баар 60-тан тахса дойду кыттыыны ылар.