«Өрөбүл күн дьаарбаҥката» тэрээһин сэттис төгүлүн ыытылынна

“Өрөбүл күн дьаарбаҥката” диэн ааттаах «СахаАгроПродукт» ыытар тэрээһиннэ быйыл сэттис төгүлүн буолан ааста. Манна сыалаах эттэн саҕалаан, кэтилиэт, сыыр, халбааһыы, ынах арыыта, балык курдук амтаннаах ас арааһа атыыга таҕыста.

Мантан кыһын идэһэ өлөрүүтэ маассабайдык саҕаланнаҕына, бородууксуйа арааһа өссө элбиэ диэн тэрийээччилэр этэллэр.

«Оҥорон таһаарааччылары барыларын бииргэ түмэн, баар бородууксуйаларын атыыга таһаарабыт. Ону тэҥэ улахан былааннардаахпыт. Билигин чуолаан «Сөпкө аһааһын» («Правильное питание») хайысханы сайыннарыыга үлэ бара турар» — диэн «СахаАгроПродукт» хампаанньа дириэктэрэ Павел Чириков кэпсээтэ.

Өрөбүл күн куорат олохтоохторо тыаттан киирбит сибиэһэй бородууксуйаны хото атыылаһан, уһун кыһыны туоруур аһы-үөлү хаһааннылар.

Кэлэр өрөбүллэргэ тустаах дьаарбанка Орджоникидзе болуоссатыгар тэриллэн ыытыллыа.