Өрөспүүбүлүкэ алта улууһугар хомуур үлэтэ түмүктэннэ

НВК САХА — Өрөспүүбүлүкэ алта улууһугар кыстык от уонна сүөһү эбии аһылыгын хомуурун, быйылгы былааннарын таһынан толорон, үлэлэрин түмүктээтилэр. Бу туһунан Тыа хаһаайыстыбатын пресс-сулууспата иһитиннэрэр.

Ол курдук, Таатта улууһа былааннаммыт 37,7 туоннаттан аһары баран 39 туоннаны ылла. Абый, Уус Майа, Эдьгээн, Дьааҥы оройуоннара уонна Жатай бөһүөлэгэ былааннарын толордулар. Ол кэннэ Сунтаар, Бүлүү, Чурапчы уонна Ленскэй оройуоннара иһэллэр.

«Атын улуустарга үлэ салҕанар. Билигин күн-дьыл туруга хомуур үлэтин уустугурдар, ол эрээри хаһаайыстыбалар былааны толорорго бигэ эрэллээхтэр», — диэн Тыа хаһаайыстыбатын миниистирэ Александр Атласов эттэ.

Министиэристибэ тириэрдэринэн 2019 сылга хомуур үлэтин былааннамытынан 479,4 тыһыынча туонна от, 24,3 тыһыынча туонна сиилэс, 14,2 тыһыынча туонна сенаж бэлэмнэниэхтээх. Сылыктааһын быһыытынан быйылгы түмүк көрдөрүү былаан 95 %-гар тэҥнэһиэ.

Хомуур үлэтигэр уопсайа 17 тыһыынча киһи, 6 тыһыынчаттан тахса тиэхиньикэ кытынна. Уопсайа 3952 туонна сенаж бэлэмнэннэ, бу быйылгы былаан 28 %-гар тэҥнэһэр. Ону тэҥэ өрөспүүбүлүкэ бары улуустарыгар оҕуруот аһын күһүҥҥү хомуура бара турар.