Өрөспүүбүлүкэҕэ хортуоппуй хомуурун үлэтэ саҕаланна

НВК САХА – Дьокуускай эргин хаһаайыстыбалара хортуоппуй хомууругар туруннулар. Биир бастакынан Маҕан уокурук фермерэ Юрий Ксенофонтов биригээдэтэ бааһынатыгар киирэн, хайыы үйэ 50 туонна хортуоппуйу хостоото.

Быйыл үүнүү орто үчүгэй. Быһа барыллаан биир гектартан 6-7 туоннаны ылыахтара, онон холбоон 700 туоннаны хостуурга соруналлар. Билигин бааһынаҕа уонна хортуоппуйу наардааһыҥҥа 20 -чэ киһи үлэлиир. Хортуоппуйдарын утары хаһаанар сиргэ киллэрэн ыраастаан уураллар. Билиҥҥитэ 30 туоннаны наардаан, сороҕун атыыга ыыталлар уонна эһиилги ыһыыга хааллараллар. Маны таһынан хаһаайыстыба 38 туоннаны Горснабка уонна Туймаада ФАПКаҕа туттарыаҕа.

«Кэлбитин барытын ыраастаан, суордунан наардаан, улахан, кыра уонна орто диэн сааһылыыбыт. Күҥҥэ ортотунан 10 туоннаны хомуйабыт. Тиэхиньикэттэн биир масыына уонна биир тыраахтар үлэлиир. Балаҕан ыйын бүтүүтэ, алтынньы ый саҥата хомуур үлэтэ түмүктэниэ», – диэн биригээдэ үлэһитэ Андрей Романовкэпсээтэ.