Өрөспүүбүлүкэҕэ оттооһуну 90 % толорорго былааннанар

Өрөспүүбүлүкэҕэ оттооһуну 90 % толорорго былааннанар. Бу туһунан өрөспүүбүлүкэ баһылыга Айсен Николаев «Саха сирэ, иннин диэки!» («Якутия, вперед!») биэриигэ иһитиннэрдэ.

«Бу сылга 400000 туонна оту бэлэмниир былааннаах этибит. Анал идэлээхтэр ааҕыыларынан, бу былаан 90 % туолуоҕа», — диэн бэлиэтээтэ Айсен Николаев.

Өрөспүүбүлүкэ баһылыга этэринэн, оттооһуҥҥа халлаан туруга уустук балаһыанньаны үөскэттэ. Өрөспүүбүлүкэ киин уонна өрүс уҥуордааҕы оройуоннарыгар бэс ыйыгар итии, кураанах күннэр турбуттара от үүнүүтүгэр дьайда.

«От тиийбэт буолуутун үлэлии сылдьар мобильнай биригээдэлэр, өрөспүүбүлүкэ атын оройуоннара хааччыйыахтара», — диэтэ Айсен Николаев.