Өрөспүүбүлүкэ салалтата бүддьүөтү чөлүгэр түһэрии былаанын бэлэмниир

Саха сиригэр коронавирус инфекцията тарҕаныытынан олохтоммут пандемия кэнниттэн экономическэй кризистэн тахсыы былаана бэлэмнэнэр. Бу туһунан Ил Дархан Айсен Николаев «Ил Дарханныын кэпсэтии» биэриигэ кэпсээтэ.

Өрөспүүбүлүкэ баһылыга бэлиэтииринэн, Саха сирин орто уонна алын бизнеһэ Россия атын регионнарын кытта холоотоххо улахан хоромньу ылбата.

«Саамай улахан охсууну АЛРОСА хампаанньа ылла. Аан дойду үрдүнэн алмаас атыыта намтааһына бэлиэтэнэр. Балаһыанньа 2021 сылга биирдэ чөлүгэр түһэрэ сабаҕаланар», — диэн эттэ.

Саха өрөспүүбүлүкэтин бырабыыталыстыбата экономическэй кризистэн тахсыы уонна бүддьүөтү чөлүгэр түһэрии былаанын оҥорон саҕалаабытын, ону тэҥэ федеральнай былаас уорганнарын уонна чааһынай тэрилтэлэри кытта кэпсэтиилэри ыытыы хайыы үйэ бара турарын иһитиннэрдэ.